Gicumbi: Bibutse Abagore n’abana barenga 500 bishwe bazira kwitwa Abatutsi
Amateka ashariye y’ubwicanyi bwakorewe mu Karere ka Gicumbi, agaragaza ko hari ababyeyi b’abagore 268 bishwe bazira kwitwa Abatutsi, ndetse n’abana 245 nabo bazize ubwoko bwabo, nk’ uko bigaragazwa n’igitabo cy’ amateka y’ubwicanyi bwakorewe Abatutsi muri 1994 mu Karere ka Gicumbi.
Babigarutseho kuri uyu wa 15 Gicurasi 2026, mu gikorwa cyo kwibuka ku nshuro ya 32 Jenoside yakorewe Abatutsi, by’ umwihariko bazirikana abagore n’abana bavukijwe ubuzima bwabo.
Muri Aka Karere ka Gicumbi kahoze kitwa Perefegitura ya Byumba yari igizwe n’amakomini 17, habaye ubwicanyi ndengakamere kimwe n’ahandi hose mu gihugu, gusa ababashije kurokoka byatewe n’uko ariho hari amarembo yo gutangiza urugamba rwo kubohora igihugu, bakaba bashimira Inkotanyi zahageze zikabarokora batari bapfira gushira.
Igikorwa cyo kwibuka abagore n’abana cyabereye mu Murenge wa Nyankenke, bashimiye ubutwari bw’ Inkotanyi zabohoye igihugu cyari cyarabaswe n’ubwicanyi n’ironda moko.
Iki gikorwa cyo kwibuka cyabanjirijwe no gushyira indabo ku Rwibutso rwa Mukeri ruherereye mu Murenge wa Byumba, mu rwego rwo gusubiza agaciro abishwe bazira uko bavutse ndetse no gushyira indabo ku rwibutso rwa Mukeri.
Nyuma y’ubutumwa bwagarukaga ku ngaruka za Jenoside yakorewe Abatutsi muri Gicumbi, habayeho no kuremera abarokotse mu rwego rwo kubafata mu mugogo, hatangwa inka ndetse abandi bahabwa ibyo ibiryamirwa ( Matelas).
Umuyobozi w’Akarere ka Gicumbi wungirije ushinzwe Ubukungu Uwera Parfaite, avuga ko hibutswe abagore n’abana, ariko kuri ubu nta muntu wifuza ko ibyabayeho byakongera kubaho ukundi, ahubwo tugafatanya kurwanya abagifite ingengabitekerezo y’amacakubiri, abatekereza kubiba urwango, hakabaho kubaka ubumwe bw’ abanya Rwanda, no gutekereza ku iterambere ry’ igihugu kizira amacakubiri.
Kwica Abagore n’abana mu Rwanda byagaragaje ubugwari bukomeye, kuko nta mbaraga bari bafite zo kurwanya ababahigaga mu gihugu, ndetse ko hari n’abicaga abana b’ibitambambuga batari bazizwa uko bavutse.
Igikorwa cyo kwibuka Abagore n’abana cyabereye mu Murenge wa Nyankenke, kitabiriwe n’inzego zitandukanye, abaturage b’uyu Murenge, ubuyobozi bwa Ibuka, gusa basaba abaturage kurushaho ” Kwibuka twiyubaka”.
