Gicumbi: Hafashwe Abarembetsi 37, abarenga ijana barafungwa! , umuburo ku bijandika mu biyobyabwenge birimo na Kanyanga

Akarere ka Gicumbi ku bufatanye n’inzego z’ umutekano bamennye Litiro 1100 za Kanyanga yafashwe mu mujyi wa Byumba no mu nkengero zaho, ndetse bamennye Litiro 25 za Ethanol, ndetse n’ urumogi rwari rutegereje kuzacuruzwa rukangiza urubyiruko rw’ u Rwanda n’abakuze.

Ni ubutumwa bwagarutsweho kuri uyu wa 05 Nzeri 2026 mu gikorwa cyo kumena ibiyobyabwenge byiganjemo Kanyanga ikunze kwinjizwa iturutse mu bihugu by’ abaturanyi.

Ubuyobozi bwa Police ikorera mu Karere ka Gicumbi bwihanangirije umuntu wese utari wazibukira ingeso zo kwijandika mu biyobyabwenge, kuko hatangijwe ingamba nshya zo gutahura inzira z’ahanyuzwa ibiyobyabwenge, kandi hari gukoreshwa ikoranabuhanga rya Drones ibashakisha amasaha yose,  basaba abaturage kubireka kuko uzafatwa hazakurikizwa amategeko nta kujenjeka.

Umuyobozi w’Akarere ka Gicumbi Nzabonimpa Emmanuel yasabye abaturage biganjemo n’urubyiruko runywa ibiyobyabwenge, ababyinjiza bazwi nk’ Abarembetsi, ndetse n’ ababicuruza kuva muri ibi byaha hakiri kare kuko usibye gufungwa bizateza ubukene n’amakimbirane mu miryango yabo.

Yagize Ati:” Mumenye ko hashyizweho ingamba zikomeye, turakoresha n’ikoranabuhanga, abaturage nabo baduhe amakuru, nubwo hari ibiducika ariko abafatwa barahura n’ingaruka zikomeye , mureke dufatanye twese turwanye ibiyobyabwenge kuko birangiza ubuzima bw’ abaturage”.

Bamwe mu baturage usanga basura imiryango yabo ifunzwe izira gucuruza ibiyobyabwenge, bemeza ko hari ingo zisenyuka kuko bamwe bafungwa barangiza igihano bagasanga abo bashakanye barashatse abandi, bigatuma abana babo babyeyi bava mu mashuri, ndetse bikongera n’igwingira mu bana kuko bene abo babyeyi usanga bahugiye mu gushaka amaramuko ariko babinyujije mu ngeso zitemewe.

Umwe mu rubyiruko yagize Ati:” Naje gusura Mama kandi afunzwe azira Kanyanga, kuwa mbere tuzatangira ishuri kandi nta bikoresho mfite no kurya niwe wajyaga atugaburira, ubwo se turabaho gute?”.

Ngendahimana we ashimangira ko Abarembetsi binjiza Kanyanga iturutse mu gihugu cya Uganda banyura mu nzira zitemewe, ariko kandi bakagira n’ingeso zo guhungabanya umutekano mu gihe bahuye n’ushaka kubakumira, ndetse ko iyo bamenye uwatanze amakuru y’inzira banyuzemo nawe bitamworohera.

Police ikorera muri aka Karere ishimangira ko haba abinjiza cyangwa abanywa Kanyanga bose barakomeza kubashakisha uruhindu, abacuruza inzoga zitemewe ndetse n’ ibinyobwa bitujuje ubuziranenge bose barafatwa, gusa itanga umuburo ko bashatse babivamo hakiri kare kuko usibye kudindiza iterambere ryabo nta kindi bazakuramo, kandi ko ikigamijwe ari ukwita ku buzima bw’ abanyarwanda, kubacungira umutekano wabo ndetse n’ibyabo.