Abasenateri basabye kongerwa ubugenzuzi n’ubukangurambaga mu gukumira ibiza
Abasenateri bagize Komisiyo y’Ububanyi n’Amahanga, Ubumwe bw’Abanyarwanda n’Umutekano basabye ko hashyirwa imbaraga kurushaho mu gukumira no guhangana n’ibiza, hibandwa ku bugenzuzi buhoraho bw’imishinga y’iterambere, kongera ubukangurambaga bugenewe abaturage no guteza imbere imiturire itekanye kandi irambye.
Ibi babigarutseho mu kiganiro bagiranye n’Umuyobozi Mukuru w’Ikigo cy’Igihugu gishinzwe Kubungabunga Ibidukikije (REMA), Juliet Kabera, cyagarutse ku ishyirwa mu bikorwa ry’ingamba zigamije kugabanya ibyago by’ibiza no kubaka ubushobozi bwo kubyihanganira.
Abasenateri bagaragaje ko ubugenzuzi bw’imishinga bukwiye gukorwa mu buryo buhoraho kuva igitangira kugeza irangiye, hagamijwe kureba niba yubahiriza ibisabwa bikubiye muri raporo z’isuzuma ry’ingaruka ku bidukikije. Bashimangiye ko kubahiriza ibyemezo n’inama bikubiye muri izo raporo ari imwe mu nkingi z’ingenzi zo kurinda ibidukikije no gukumira ibikorwa bishobora guteza ibiza.
Basabye kandi ko ubukangurambaga bukomeza kugera ku baturage bose, bagasobanurirwa akamaro ko guteganya ibikorwa by’iterambere bishingiye ku gukumira ibiza no kubungabunga ibidukikije, aho gutegereza ko ibiza bibaho kugira ngo hafatwe ingamba zo kubikemura.
Mu bisobanuro byatanzwe na REMA, hagaragajwe ko kunoza imyubakire no kubahiriza igishushanyo mbonera cy’imikoreshereze y’ubutaka biri mu ngamba z’ingenzi zifasha igihugu guhangana n’ingaruka z’imihindagurikire y’ikirere n’ibiza.
REMA yagaragaje ko imyubakire iteguye neza ituma ubutaka bukoreshwa mu buryo bunoze, ikanoroshya gufata amazi y’imvura, kuyabika no kuyatunganya kugira ngo yifashishwe mu bikorwa bitandukanye by’iterambere, aho kuba intandaro y’ibiza. Yanagaragaje ko gutura ahateganyijwe bituma byoroha kugeza ku baturage ibikorwaremezo remezo birimo imihanda, amazi meza, amashanyarazi n’izindi serivisi z’ibanze.
Iki kigo cyongeye gushimangira ko igisubizo kirambye ari uguteza imbere imiturire yo mu midugudu no kubaka inyubako zigeretse, kugira ngo ubutaka bubyazwe umusaruro mu buryo burambye. Ubu buryo butuma haboneka ubutaka buhagije bwo guturaho, ubuhinzi ndetse no gutera amashyamba, bityo bukagira uruhare rukomeye mu kubungabunga urusobe rw’ibinyabuzima no kurengera ibidukikije.
REMA kandi yasobanuye ko iyo imiturire n’ibikorwaremezo biteguwe neza, amazi y’imvura ashobora kwegeranywa, agatunganywa kandi akongera gakoreshwa mu bikorwa by’iterambere. N’ayo adafashwe ashobora kuyoborwa mu miyoboro yabugenewe, bikarinda ko yangiza ibikorwaremezo cyangwa ngo ateze ibiza.
Ibi byose byagarutsweho mu gihe u Rwanda rukomeje gushora imbaraga mu kubaka ubushobozi bwo guhangana n’ingaruka z’imihindagurikire y’ikirere, binyuze mu igenamigambi rishingiye ku kubungabunga ibidukikije, imikoreshereze iboneye y’ubutaka no guteza imbere imiturire irambye, hagamijwe kurinda ubuzima bw’abaturage n’umutungo wabo.
