Pariki y’igihugu y’Akagera yinjije asaga Miliyari 1.7 Frw mu mezi 3 ya 2026, izamukaho 8%,Abasura barenga 11,700
Pariki y’Igihugu y’Akagera yakomeje kwitwara neza mu rwego rw’ubukerarugendo n’ubukungu bushingiye ku bidukikije, aho mu gihembwe cya mbere cy’umwaka wa 2026 (Mutarama–Werurwe) yinjije amafaranga arenga $1,337,000 (asaga Miliyari 1.7 Frw), bingana n’izamuka rya 8% ugereranyije n’igihe nk’icyo mu 2025.
Muri icyo gihe, iyi pariki yakiriye abayisura barenga 11,700, aho umubare munini ugizwe n’Abanyarwanda.
Iri zamuka rifitanye isano n’ubwamamare bukomeje kwiyongera bw’iyi pariki ku rwego mpuzamahanga, aho yashyizwe ku rutonde rw’ahantu 25 hagomba gusurwa ku isi muri 2026 n’ikinyamakuru National Geographic. Byiyongeraho ifungurwa rya Wilderness Magashi Peninsula, ubukangurambaga bwa RDB/Visit Rwanda, ndetse n’ubufatanye bukomeje n’itangazamakuru ryo mu Rwanda no ku rwego mpuzamahanga.
Mu kwezi kwa Gashyantare 2026, habaye ibikorwa bikomeye byo gukurikirana inyamaswa hifashishijwe ikoranabuhanga. Inzobere zashyize utwuma twa GPS ku ntare eshatu n’inzovu imwe, mu gihe inkura 17 z’umweru n’inkura 8 z’umukara zashyizwemo utwuma twa VHF mu mahembe yazo.
Byongeye kandi, intare 5 z’ingore zakorewe uburyo bwo kuboneza urubyaro (contraception) mu rwego rwo kugenzura ubwiyongere bwazo. Igikorwa cyo gutera umuti (darting) inkura 8 z’umukara cyabaye intambwe ikomeye, kuko cyarenze umubare wa 7 wagezweho mu mwaka ushize.
Mu mezi atatu ashize, itsinda rishinzwe umutekano ryakoze iminsi 4,985 riri mu kazi, rikora amarondo 1,570 ku ntera ya kilometero 35,271. Ibi byatumye hafatwa abantu 7, hanasanzwe imitego 23 y’insinga.
Mu bijyanye no gukurikirana inkura, inkura z’umweru zagaragaye inshuro 2,563, mu gihe inkura z’umukara zagaragaye inshuro 363.
Ibikorwa byo kwigisha no gukangurira abaturage kubungabunga ibidukikije byageze ku bantu barenga 22,500.
Mu bijyanye n’inyungu ku baturage, ibikorwa by’ubukungu bikorerwa hafi ya Pariki byinjije $168,226.83 (asaga Miliyoni 218 Frw), birimo: Uburobyi: $59,770 (asaga Miliyoni 77 Frw),Ubuvumvu: $17,309 (asaga Miliyoni 22 Frw),Amakoperative (ubukorikori, inkoko, amacumbi): $16,998.83 (asaga Miliyoni 22 Frw),Abayobora ingendo: $31,922 (asaga Miliyoni 41 Frw),Abubatsi n’abakozi ba nyakabyizi: $42,227 (asaga Miliyoni 55 Frw)
Byongeye, amafaranga $158,277 (asaga Miliyoni 205 Frw) yakoreshejwe mu kugura ibicuruzwa na serivisi mu baturage baturiye pariki, bigirira akamaro abanyamuryango barenga 2,900.
Itsinda ry’ubushakashatsi ryamenye inzovu nshya 4, bituma izamaze kumenyekana ku giti cyazo ziba 110, zingana na 77.5% by’inzovu zose 142 zibarizwa muri pariki.
Mu byabonetse bidasanzwe harimo ifatwa ry’ifoto ya giant pangolin, ndetse n’inkura y’umukara yitwa Juru igaragara irimo gusabana n’inkura z’umweru.
Iyi Pariki kandi irateganya guteza imbere ubukerarugendo bushingiye ku bworozi bw’amafi binyuze muri Gishanda Fish Farm, igamije guteza imbere umutekano w’ibiribwa no kongera ubumenyi ku baturage.
Iyi ntambwe igaragaza ko ubukerarugendo bushobora kuba umusemburo ukomeye w’iterambere rirambye, bufasha kubungabunga ibidukikije no kuzamura imibereho y’abaturage.
