AmakuruUburezi

Musanze: Amashuri akorana na UNESCO aragaragaza inyungu za AI mu burezi

Abayobozi b’ibigo by’amashuri akorana na UNESCO mu Rwanda baravuga ko ikoranabuhanga ry’ubwenge buhangano (Artificial Intelligence – AI) rikwiye kurushaho kwinjizwa mu myigire n’imyigishirize, kuko rishobora gufasha abarimu gutegura amasomo no gufasha abanyeshuri kwagura ubumenyi binyuze mu bushakashatsi.

Icyakora, bagaragaza ko hakiri imbogamizi zirimo ibikoresho by’ikoranabuhanga bidahagije, ubushobozi buke bwa murandasi n’ubumenyi butangana mu gukoresha AI, bityo bagasaba ko hashyirwa imbaraga mu kuyikoresha mu buryo buboneye itabangamira ireme ry’uburezi.

Ibi byagarutsweho ku wa Kane, tariki ya 19 Ugushyingo 2026, mu nama ngarukamwaka y’urunana rw’amashuri yimakaza amahame n’indangagaciro bya UNESCO (UNESCO Associated Schools Network – ASPnet), yabereye mu Karere ka Musanze, igahuza abayobozi b’inzego zitandukanye n’ab’ibigo by’amashuri.

Iyi nama y’iminsi ibiri ni n’amahugurwa agamije kurebera hamwe uko ikoranabuhanga rigezweho, by’umwihariko AI, ryakoreshwa mu guteza imbere uburezi bufite ireme, ubudaheza n’izindi gahunda za UNESCO zishyirwa mu bikorwa mu mashuri.

Inkuru mu mashusho

Umuyobozi w’Ishuri Nderabarezi rya Muhanga, Jeanne d’Arc Mukabatesi, yavuze ko AI imaze kugaragaza akamaro mu kunoza imyigishirize, cyane cyane mu gufasha abarimu gutegura amasomo no kongera ubushobozi bwabo mu kazi ka buri munsi.

Yagize ati: “Gukoresha ubwenge buhangano (AI) mu mashuri ni byiza, kandi icyiza kurushaho ni uko abarimu bose mu Rwanda bamaze kubona impamyabumenyi zibemerera gukoresha ubwo bwenge buhangano. No mu myigishirize, iyo tubasura kenshi dusuzuma uko bateguye amasomo bigisha abanyeshuri, bigaragara ko AI iri kubafasha cyane.”

Yakomeje avuga ko amashuri nderabarezi yashyizwemo imbaraga mu bijyanye n’ibikorwaremezo by’ikoranabuhanga, birimo murandasi, mudasobwa na tabuleti, ku buryo abarimu babasha kwifashisha AI mu gutegura no kunoza amasomo. Icyakora, yemera ko ibyo bikoresho n’umuyoboro wa murandasi bitarakwira ku buryo bukemura ibikenewe byose.

Mukabatesi kandi yagaragaje ko hari abarimu bagikwiye kongererwa ubumenyi mu gukoresha AI, cyane cyane mu gutandukanya amakuru afatika n’adakwiye gukoreshwa mu myigishirize.

Ati: “Amahugurwa kuri AI akimara guhabwa abarimu bamaze kubona impamyabumenyi, hari abayikoreshaga bakayisaba kubategurira isomo bazaha abanyeshuri, wajya kubasura ugasanga barateruye ibyo yabahaye byose. Inshingano zacu nk’abayobozi ni ugusuzuma ibi, kandi turabikora, ku buryo umwarimu agomba kwemera gukorana na yo ariko akanashungura ibikwiye, atajyana inyandiko zose zitareba abana.”

Yasobanuye ko AI idakwiye gufatwa nk’ikoranabuhanga risimbura umwarimu, ahubwo ko ikwiye kuba igikoresho kimwunganira mu gutegura amasomo no gufasha abanyeshuri gukora ubushakashatsi bwagutse.

Ku rundi ruhande, Umuyobozi wungirije ushinzwe amasomo muri Lycée de Kigali, Manirakiza Frère Paulin, yavuze ko nubwo AI ishobora gufasha abarimu n’abanyeshuri, hari imbogamizi zishingiye ku buryo abanyeshuri bemererwa gukoresha ibikoresho by’ikoranabuhanga ndetse n’ubushobozi bwa murandasi mu bigo by’amashuri.

Yagize ati: “Mu ikoranabuhanga rigezweho harimo byinshi, ubwenge buhangano burakoreshwa haba mu banyeshuri no mu barezi, ariko kugeza ubu imbogamizi tugifite ni uko abanyeshuri bataremererwa gukoresha imashini na telefone byabo mu ishuri, ndetse kugeza ubu biracyagoye kubona umwanya wo kuba bakwisanzura.”

Yakomeje agaragaza ko ikibazo cya murandasi na cyo gikwiye kwitabwaho, cyane cyane mu bigo bifite abanyeshuri benshi bayikoresha icyarimwe.

Ati: “Ikindi ni uko na murandasi idahagije, kuko usanga abanyeshuri bagera ku 1,000 bayikoresha icyarimwe, bitabasha koroha.”

Manirakiza yashimangiye ko hakwiye gushyirwa imbaraga mu kwigisha abanyeshuri gukoresha AI nk’igikoresho kibunganira mu bushakashatsi, aho kuyishingikirizaho ngo ibakorere imirimo yose.

Ati: “Hari ugushishikariza abana gukoresha ubwenge buhangano bagamije ko ibunganira, atari ukuvuga ngo bakeneye ko ibasubiriza buri kimwe, bo bagaterura ibyo bakuyeho gusa, kuko icyo yazaniwe ni koroshya uburyo bwo gukora ubushakashatsi, si ugukuraho umuhati w’umunyeshuri cyangwa umurezi, haba gufata mu mutwe cyangwa kugira ubumenyi bw’umwimerere kuri we.”

Umunyamabanga Mukuru wa Komisiyo y’Igihugu y’u Rwanda ikorana na UNESCO, Albert Mutesa, yavuze ko ikoreshwa ry’ikoranabuhanga ari kimwe mu bigize imikoranire ya UNESCO n’inzego zitandukanye z’igihugu, hagamijwe guhuza iterambere ry’ikoranabuhanga n’izindi gahunda zirimo uburezi, kubungabunga ibidukikije n’umuco.

Yagize ati: “Mu mikoranire ya UNESCO mu bikorwa byayo bitandukanye birimo kubungabunga ibidukikije, uburezi ndetse n’umuco, dusangamo n’imikoreshereze y’ikoranabuhanga binyuze muri za minisiteri zibishinzwe, ku buryo usanga uru rukomatane rudufasha kubishyira mu bikorwa ariko tunajyana n’aho iterambere rigeze ku ruhando mpuzamahanga.”

Mutesa yavuze ko UNESCO idashyira imbere ireme ry’uburezi rishingiye gusa ku bumenyi abanyeshuri bahabwa, ahubwo ko inaharanira ko buri wese agira amahirwe yo kwiga, uburezi bukaba budaheza kandi bukajyana na gahunda zo kubungabunga ibidukikije.

Ku bijyanye n’urunana rw’amashuri akorana na UNESCO, yasobanuye ko iyi nama ngarukamwaka y’iminsi ibiri igamije kwibutsa abayobozi b’ibigo gahunda z’uyu muryango, gusuzuma aho zigeze zishyirwa mu bikorwa no kubafasha kumenya uko bakwitwara ku mpinduka z’ikoranabuhanga, zirimo ubwenge buhangano.

Yavuze ko uru runana rukorera mu bihugu bigera kuri 130 ku isi, rukaba rugizwe n’amashuri arenga 12,000, mu gihe mu Rwanda hari amashuri n’ama-clubs bigera kuri 60.

Iyi nama ibaye mu gihe ikoreshwa rya AI rikomeje kwaguka mu nzego zitandukanye, harimo n’uburezi, aho ritanga amahirwe yo koroshya ubushakashatsi, kunoza imyigishirize no gufasha abantu kubona amakuru mu buryo bwihuse. Icyakora, imikoreshereze yayo isaba ubunyamwuga, ubushishozi no kugenzura amakuru itanga kugira ngo idasimbura ubushobozi bwo gutekereza no guhanga udushya bw’umuntu.

UNESCO ishyigikira ikoreshwa ry’ubwenge buhangano mu buryo bwubahiriza amahame mbwirizamuco, uburenganzira bwa muntu n’iterambere ridashyira abantu ku ruhande. Mu Rwanda, uyu muryango wakoranye n’inzego zitandukanye mu guteza imbere imikoreshereze ya AI ishingiye ku nshingano, umutekano n’inyungu rusange.

Jeanne d’Arc Mukabatesi,,umuyobozi w’Ishuri Nderabarezi rya Muhanga, agaragaza ko ikoranabuhanga ry’ubwenge buhangano (AI) rifasha abarimu kunoza imyigishirize, gutegura amasomo no kongera ubumenyi, ariko ko risaba kurikoresha ubushishozi kugira ngo ritabasimbura mu nshingano zabo.
Umuyobozi wungirije ushinzwe amasomo muri Lycée de Kigal Manirakiza Frère Paulin i, asanga ubwenge buhangano (AI) bukwiye kuba igikoresho gifasha abanyeshuri n’abarimu mu bushakashatsi, aho kuba ikoranabuhanga ribakorera imirimo yose. Asaba ko hanongerwa ubushobozi bwa murandasi mu mashuri.
Umunyamabanga Mukuru wa Komisiyo y’Igihugu y’u Rwanda ikorana na UNESCO Albert Mutesa, , ashimangira akamaro ko guhuza ikoranabuhanga rigezweho, uburezi budaheza no kubungabunga ibidukikije n’umuco, mu rwego rwo guteza imbere ireme ry’uburezi no kugendana n’impinduka ziri ku rwego mpuzamahanga.
Abayobozi b’ibigo by’amashuri akorana na UNESCO mu Rwanda bitabiriye inama ngarukamwaka yabereye i Musanze, baganira ku buryo ikoranabuhanga ry’ubwenge buhangano (AI) ryakoreshwa mu kunoza imyigire n’imyigishirize no guteza imbere uburezi budaheza.