Minisitiri Christine Nkulikiyinka yashimangiye uruhare rw’ubufatanye mu guhanga imirimo no guteza imbere ubukungu bwihanganira ihindagurika
Ku wa Gatanu tariki ya 1 Gicurasi 2026, Minisitiri Christine Nkulikiyinka yitabiriye ibirori byo kwizihiza Umunsi Mpuzamahanga w’Umurimo (International Labour Day 2026) byabereye muri Kaminuza y’u Rwanda.
Ni umunsi wahuje abakozi, abakoresha n’abafatanyabikorwa mu rwego rwo gushimira no guha agaciro uruhare rw’Abanyarwanda bose bagira uruhare mu iterambere ry’igihugu binyuze mu murimo, guhanga udushya no guteza imbere inzego zinyuranye z’ubukungu.
Ibi birori byabaye biri ku nsanganyamatsiko igira iti: “Gufatanya mu guteza imbere ubumenyi, kongera imirimo no kubaka ubukungu bwihanganira ihungabana”, igaragaza uruhare rukomeye rw’abakozi mu rugendo rw’iterambere ry’igihugu, ndetse inagaruka ku kamaro k’ubufatanye mu kongera ubumenyi, kwagura amahirwe y’akazi no kubaka ubukungu bushobora guhangana n’ihindagurika ry’ubukungu ku rwego rw’isi.
Abitabiriye ibi biganiro bashimangiye ko hakenewe kwihutisha gahunda zo guhanga imirimo mishya, kongera umusaruro w’abakozi, no gushyigikira inzego z’ingenzi zirimo ubuhinzi, inganda na serivisi. Hanagaragajwe kandi ko ikoranabuhanga (digital transformation) rikwiye kwihutishwa mu rwego rwo kunoza imitangire ya serivisi no guteza imbere ubukungu burambye kandi budaheza.
By’umwihariko, hibanzwe ku gutegura urubyiruko rw’u Rwanda binyuze mu kurwongerera ubumenyi bujyanye n’isoko ry’umurimo, kugira ngo rushobore kubyaza umusaruro amahirwe ari mu gihugu no ku rwego mpuzamahanga, bityo igihugu kirusheho kungukira mu mubare munini w’abakiri bato.
Minisitiri Christine Nkulikiyinka yongeye gushimangira ko Guverinoma y’u Rwanda yiyemeje guteza imbere imirimo iboneye , kongerera imbaraga ubufatanye hagati ya Leta n’abikorera, no gushyira imbaraga mu buryo bwatuma iterambere ry’ubukungu rigera kuri bose, rihinduka amahirwe nyayo y’imibereho myiza ku Banyarwanda bose.
