Gicumbi: Bahagurukiye ikibazo cy’ ababyeyi batuzuza inshingano zo kugarura abana bataye amashuri
Ubuyobozi bw’Akarere ka Gicumbi bwahagurukiye kwita ku bibazo by’ abana bata amashuri, basaba abarezi kwerekana urutonde rw’ abana batari kwiga ndetse no kwerekana abagarutse kwiga hagamijwe kwimakaza uburezi bufite ireme.
Babigarutseho kuri uyu wa 16 Mata 2026, mu nama y’imyiteguro y’itangira ry’ amashuri igihembwe cya Gatatu, ihuza abayobozi b’ibigo by’amashuri, abafatanyabikorwa ndetse n’ abayobozi mu nzego z’ibanze.
Muri iyi nama bavuze ko nta mwana wemerewe kurema isoko mu minsi y’amashuri, ababyeyi basabwa gutanga ibikoresho by’ ishuri ndetse n’abarimu bagahamagara abanyeshuri umunsi ku munsi kuko iyo umwana amaze iminsi itatu ataza kwiga bituma atangira kwibagirana.
Ibindi byagarutsweho ni ukurebera hamwe impamvu ituma abana bata ishuri bagafatanya gushaka ibisubizo, kureba uko bagaburirwa, guhindura imyumvire y’ababyeyi batuzuza inshingano, kwimakaza umuco w’isuku mu bigo by’ amashuri, no gusaba abarezi kugira inshingano zo gufasha abana kwiga hatagamijwe gutanga ibihano byo kubirukana mu mashuri.
Umuyobozi w’Akarere ka Gicumbi Nzabonimpa Emmanuel yasabye kumenya ko buri wese ari umubyeyi, bakita ku bibazo bimwe na bimwe bituma birukana abana mu buryo budakwiye, ahubwo bakarushaho kugira imikoranire n’ababyeyi byaba ngombwa bakifashisha ubuyobozi bw’ ibanze.
Yagize Ati:” Tugomba kwita ku mabwiriza agenga uburezi kuruta uko twatekereza ku mikorere bwite y’ibigo by’ amashuri, kuko byatuma habaho kwirukana abana ku mashuri kandi hakabayeho ubufatanye bw’inzego zitandukanye”.
Yongera Ati:” hagomba gushyirwa imbaraga mu isuku yaho bategurira amafunguro y’abana ariko ntihakumvikane abana bahuye n’ibiryo bihumanye, mureke duhurire mu isibo n’ingoga temenye abana batari kwiga, tuganirize ababyeyi babo batuzuza inshingano ndetse aho bibaye ngombwa dufatanye gushaka ibisubizo”.
Umuyobozi w’Akarere wungirije ushinzwe imibereho myiza Mbonyintwari Jean Marie Vianney avuga ko hagomba gusobanurwa itegeko rihana ababuza abana kujya ku ishuri, ababakoresha imirimo ivunanye, no gusaba abarezi kugira inshingano zo gufasha abana kujya kwiga
Bimwe mu byaganiriweho kandi, harimo gukurikirana imyigire n’imyigishirize, gukurikiranira hafi imyitwarire y’abarezi b’abana, kureba abafite ibikoni byubatse neza kandi bifite isuku, hagamijwe kwimakaza isuku yaho bategurira amafunguro y’abana, kwiga umuco wo gutera ibihingwa byiganjemo imbuto n’imboga hagamijwe kurwanya imirire mibi.
