Musanze: Abafatanyabikorwa batandukanye bahuguwe ku buhinzi bwita ku bidukikije no kubungabunga umutekano w’ibiribwa
Mu Karere ka Musanze hateraniye abantu baturutse mu miryango itari iya Leta, ibigo bya Leta, amashuri makuru na za kaminuza ndetse n’amatsinda y’abaturage, mu mahugurwa agamije kongerera ubushobozi abafatanyabikorwa mu guteza imbere ubuhinzi burambye bwita ku bidukikije no gukomeza kubaka uburyo bwihanganira imihindagurikire y’ikirere.
Aya mahugurwa y’iminsi itatu yateguwe n’Umuryango Rwanda Climate Change and Development Network ku bufatanye na Trócaire hamwe na University of Rwanda College of Agriculture, Forestry and Food Science. Yashyigikiwe kandi binyuze mu mikoranire yabo n’umuyoboro wa Alliance for Food Sovereignty in Africa, ugamije guteza imbere ubusugire bw’ibiribwa no gushimangira ubuhinzi burambye muri Afurika.
Mu ijambo ryo gutangiza aya mahugurwa, Salama Gata Sylvia, ushinzwe gahunda muri RCCDN, yavuze ko iki gikorwa ari umwanya mwiza wo guhuriza hamwe abafite ubumenyi n’ubunararibonye butandukanye kugira ngo bafatanye gushaka ibisubizo birambye ku bibazo biterwa n’imihindagurikire y’ikirere ndetse n’umutekano muke w’ibiribwa.
Yagaragaje ko ubuhinzi bushingiye ku mahame ya agroecology bushobora gufasha abaturage kongera umusaruro mu buryo burambye, kurinda ubutaka no kubungabunga umutungo kamere, ari na ko hubakwa ubushobozi bwo guhangana n’ingaruka z’ihindagurika ry’ikirere.
Ati: “Ni ingenzi ko gahunda zacu z’ubuhinzi zishingira ku buryo burambye kandi bwihanganira ibibazo by’ikirere. Aya mahugurwa atanga amahirwe yo guhuza ubumenyi bwa siyansi n’ubunararibonye abaturage bafite mu rwego rwo gushakira hamwe ibisubizo birambye.”
Yakomeje asaba abitabiriye amahugurwa kurushaho gusangira ibitekerezo, ubunararibonye n’amasomo yavuye mu bikorwa bakorera mu bice bitandukanye by’igihugu, kugira ngo ibyo bungukiramo bizafashe abaturage mu guteza imbere ubuhinzi butangiza ibidukikije.
Aya mahugurwa yitabiriwe n’abahagarariye imiryango inyuranye igize RCCDN, impuguke mu by’ubuhinzi n’ibidukikije, abashakashatsi ndetse n’abaharanira iterambere rirambye n’ubudahangarwa bw’abaturage.
Kabeza Angelique, ushinzwe gahunda muri Trócaire, yavuze ko ubufatanye hagati y’imiryango itandukanye ari ingenzi mu guteza imbere ubuhinzi burambye no gufasha abaturage guhangana n’ingaruka z’imihindagurikire y’ikirere.
Yagize ati: “Ubufatanye bwa RCCDN, Trócaire na UR-CAFF bufasha abaturage kubona ibisubizo birambye byazamura umusaruro w’ubuhinzi, bikarinda umutungo kamere kandi bikongera ubushobozi bwo guhangana n’ibiza n’ihindagurika ry’ikirere.”
Yongeyeho ko aya mahugurwa azafasha abafatanyabikorwa gutekereza hamwe ku buryo bwo guteza imbere imibereho myiza y’abaturage, gushimangira umutekano w’ibiribwa no kubaka ubudahangarwa bw’igihe kirekire.
Biteganyijwe ko aya mahugurwa azafasha abitabiriye kurushaho gusobanukirwa amahame n’imikorere y’ubuhinzi bwa agroecology, kongerera imbaraga ubufatanye hagati y’imiryango itandukanye, gukusanya ingero z’ibikorwa byagezweho ndetse no gukomeza ubuvugizi bushyigikira ubuhinzi burambye.
Rwanda Climate Change and Development Network ni umuyoboro uhuza imiryango itandukanye ikorera mu Rwanda mu bikorwa byo kurwanya imihindagurikire y’ikirere, kurengera ibidukikije, guteza imbere iterambere rirambye no kongerera abaturage ubushobozi bwo guhangana n’ingaruka z’ihindagurika ry’ikirere.
Binyuze mu bufatanye n’imiryango mpuzamahanga ndetse n’ibigo by’amashuri makuru, RCCDN ikomeje gushyigikira ibikorwa by’ubuhinzi burambye, ubukangurambaga bwa politiki zita ku bidukikije no guteza imbere ubushobozi bw’abaturage mu guhangana n’ibibazo by’ikirere.
