Leta yongereye inkunga ku ifumbire n’imbuto z’Indobanure mu Gihembwe cy’Ihinga cya 2027A
Minisiteri y’Ubuhinzi n’Ubworozi (MINAGRI) yashyize ahagaragara amabwiriza mashya agena uko ifumbire mvaruganda n’imbuto z’indobanure bizunganirwa na Leta mu gihembwe cy’ihinga cya 2027A, cyatangiye ku wa 1 Nyakanga 2026 kikazarangira ku wa 31 Ukuboza 2026.
Aya mabwiriza agamije gukomeza guteza imbere ubuhinzi bugezweho, kongera umusaruro no korohereza abahinzi kubona inyongeramusaruro ku giciro kiboroheye.
MINAGRI igaragaza ko inkunga ya Leta izakomeza guhabwa abahinzi b’ibigori, ibishyimbo, ingano, soya, umuceri, ibirayi, imyumbati, urutoki ndetse n’ibiti by’imbuto.
Ibi bihingwa byatoranyijwe kubera uruhare bifite mu kubungabunga umutekano w’ibiribwa, guteza imbere inganda zitunganya umusaruro w’ubuhinzi no kuzamura ubukungu bw’abaturage.
Mu rwego rwo koroshya itangwa ry’inyongeramusaruro, ibigo bitandatu birimo YARA Rwanda Ltd, ETG Inputs Ltd, Rwanda Fertilizer Company (RFC Ltd), One Acre Fund (Tubura), Transtrade Africa Ltd na Chiromo Fertilizers Ltd ni byo byemewe gukwirakwiza ifumbire mvaruganda ku bufatanye n’abacuruzi b’inyongeramusaruro bemewe hirya no hino mu gihugu.
Ifumbire izunganirwa irimo DAP, UREA 46%, NPK 17-17-17, KCL/MOP, TSP, MAP, NPS, CAN ndetse n’andi moko ya NPK avanze akwiranye n’ubwoko butandukanye bw’ubutaka n’ibihingwa.
Inkunga ya Leta izatuma umuhinzi yishyura igice cy’igiciro, mu gihe igisigaye kizishyurwa na Leta. Urugero, ikiro cya DAP kigura 1,950 Frw, ariko umuhinzi azacyishyura 1,060 Frw, naho Leta yishyure 890 Frw.
Ku ruhande rw’imbuto z’indobanure, ibigo 26 ni byo byemerewe kuzikwirakwiza mu gihugu hose. Muri byo harimo Dern Seed Company, Western Seed Company, UNICOOPAGI, Rumbuka Seeds Ltd, One Acre Fund, TRI-SEEDS Ltd, Kenya Seed Co Rwanda Ltd, AGRISEEDS Ltd, DRD Agri Business Ltd n’ibindi.
Abahinzi b’ibigori bazakomeza guhabwa imbuto za Hybrid zifite ubushobozi bwo gutanga umusaruro mwinshi. Hari amoko y’imbuto afite agaciro ka 2,585 Frw ku kilo ariko umuhinzi akazayabona ku 785 Frw kubera inkunga ya Leta, mu gihe ayagura 3,800 Frw ku kilo azishyurwa 2,000 Frw gusa n’umuhinzi.
No ku mbuto za soya, imbuto zemejwe (Certified Seed) zizunganirwa ku buryo umuhinzi azazigura ku 855 Frw ku kilo, mu gihe imbuto ziri mu cyiciro cya Quality Declared Seed zizagurwa ku 770 Frw ku kilo.
Aya mabwiriza agaragaza ko Guverinoma ikomeje gushyira imbere gahunda yo kuvugurura ubuhinzi binyuze mu kongera ikoreshwa ry’inyongeramusaruro zigezweho, hagamijwe kuzamura umusaruro ku buso buhingwa, kongera ibiribwa bihagije ku isoko, guteza imbere inganda zishingiye ku buhinzi no kuzamura imibereho y’abahinzi.
MINAGRI irasaba abahinzi gutegura ibikorwa by’ihinga hakiri kare, kwegera abajyanama b’ubuhinzi n’abacuruzi bemewe kugira ngo babone inyongeramusaruro ku gihe, ndetse bagakurikiza amabwiriza y’imikoreshereze yabyo kugira ngo umusaruro uteganyijwe uzagerweho.
Guverinoma yizera ko iyi gahunda izakomeza kugira uruhare rukomeye mu kubaka ubuhinzi bw’umwuga, burambye kandi bushobora guhangana n’ingaruka z’imihindagurikire y’ibihe.
