INES-RUHENGERI: Bavuga ko hari inyungu ikomeye bungukira mu kumurika imico y’ibihugu bitandukanye
Kuwa Gatanu tariki ya 27 Werurwe 2026, mu Ishuri rikuru ry’ubumenyingiro rya INES-RUHENGERI riherereye mu Karere ka Musanze, Intara y’Amajyaruguru, habereye ku nshuro ya gatanu igikorwa cyo kumurika umuco cyiswe Intercultural Day, cyahuje abanyeshuri baturutse mu bihugu 20 byo ku mugabane w’Afurika.
Iki gikorwa cyaranzwe n’imitambagiro y’imico itandukanye, aho buri gihugu cyagaragaje imibereho yacyo, imirire gakondo, imyambarire, imbyino n’indirimbo ziranga umuco wacyo. Byabaye umwanya wo gusangira no kwigira ku bandi binyuze mu muco, hagamijwe guteza imbere ubumwe n’ubusabane hagati y’abanyeshuri.
Reba amashusho
Abanyeshuri bitabiriye bagaragaje ko iki gikorwa kibafasha kurushaho kumenyana no kumva ko hari byinshi bahuriyeho nk’Abanyafurika. Alec Daniel Chol wo muri Sudani y’Epfo yavuze ko ibikorwa nk’ibi bifasha abanyeshuri kugaragaza umuco wabo no kuwusangiza abandi.
Ati: “Iki gikorwa kiduha umwanya wo kwerekana abo turi bo no gusangira umuco wacu n’abandi. Iyo dusangiye ubuzima bwa buri munsi, bituma turushaho kumva ko turi bamwe nubwo dutandukanye.”
Ku ruhande rwe, Musoya Nsenga Joel wo muri Repubulika Iharanira Demokarasi ya Congo, yagaragaje ko imico y’Abanyafurika ifite byinshi ihuriyeho, anashimangira ko ishobora kuba umusingi wo gukemura ibibazo byugarije umugabane.
Ati: “Nubwo dutandukanye mu ndimi n’ibihugu, imico yacu ifite byinshi ihuriyeho. Dukwiye kuyishingiraho mu kubaka ubumwe no gukemura ibibazo byacu aho kwitandukanya.”
Iki gikorwa cyanitabiriwe n’abayobozi batandukanye, barimo uhagarariye Zimbabwe mu Rwanda, Charity Manyeruke, wibukije abanyeshuri ko amasomo biga adakwiye kubafasha kubona akazi gusa, ahubwo ko bagomba no kuyabyaza umusaruro mu guteza imbere indangagaciro n’urukundo rw’umugabane w’Afurika.
Ati: “Mujye mukoresha ubumenyi mufite mu guteza imbere ibihugu byanyu no kuba umusemburo w’impinduka nziza ku mugabane wacu.”
Ibi byashimangiwe na Pascal Ngendahimana, umunyamabanga nshingwabikorwa w’Intara y’Amajyaruguru, wavuze ko ibikorwa nk’ibi bifasha abanyeshuri kwagura ubumenyi no gusobanukirwa imico itandukanye, bityo bikabategurira neza ku isoko ry’umurimo mpuzamahanga.
Ati: “Guhura kw’abanyeshuri baturutse mu bihugu bitandukanye bibafasha kwiga byinshi no kwitegura gukorera ku rwego mpuzamahanga.
Reba amashusho:
Umuyobozi w’ikirenga wa INES-Ruhengeri, Musenyeri Vincent Harorimana, yasabye abanyeshuri kubakira ku mico yabo bagaharanira ubumwe, anabibutsa ko bagomba kugira intego yo kubyaza umusaruro amasomo biga bagamije gukemura ibibazo by’ibihugu byabo.
Ati: “Guhurira hamwe kwanyu ni amahirwe akomeye yo gusangira indangagaciro no kwigira ku byiza by’abandi. Mukwiye kubyaza umusaruro aya mahirwe.”
Igikorwa cya Intercultural Day 2026 cyaranzwe n’imbyino z’umuco, gusangira amafunguro gakondo ndetse no gusobanurira abandi amateka y’ibihugu bitandukanye. Cyatanze umwanya wo kurushaho kumenyana no gusigasira ubumwe bw’Abanyafurika.
Mu bihugu byitabiriye birimo u Rwanda, Zimbabwe, Ethiopia, South Sudan, Liberia, Comoros, Mali, Romania, Central African Republic, Republic of Congo (Congo-Brazzaville), Uganda, Sudan, Niger, Guinea, Kenya, Nigeria, Ghana, Burundi, Democratic Republic of Congo (DRC) na Cameroon.
Inkuru yose mu mashusho:
INES-Ruhengeri (Institut d’Enseignement Supérieur de Ruhengeri) ni ishuri rikuru ryigenga riherereye mu Mujyi wa Musanze, mu Ntara y’Amajyaruguru y’u Rwanda, hafi y’ibirunga bya Pariki y’Igihugu y’Ibirunga (Volcanoes National Park). Ryashinzwe mu mwaka wa 2003, rikaba ritanga amasomo atandukanye arimo ubwubatsi, ubucuruzi, ikoranabuhanga, amategeko n’ibindi, rikaba rizwi mu guteza imbere ubumenyi bufite aho buhuriye n’iterambere ry’umuryango nyarwanda n’akarere.
