Ubworozi bw’Amafi mu baturage bwabaye Inzira irambye yo kubungabunga pariki y’Akagera
Ubufatanye hagati ya Pariki y’Igihugu ya Akagera n’abaturage bayituriye bukomeje kugaragaza ko kubungabunga urusobe rw’ibinyabuzima bishobora kugendana n’iterambere ry’imibereho y’abaturage.
Mu gihe henshi pariki zihura n’imbogamizi ziterwa n’ibikorwa bya muntu, Pariki y’Akagera yahisemo inzira ishingiye ku gufatanya n’abaturage, ibaha ibisubizo birambye ku bibazo by’imirire n’ubukungu.
Ubworozi bw’amafi nk’igisubizo ku mibereho n’umutekano w’ibiribwa
Binjiye mu mushinga wo korora amafi, abaturage babashije kubona ibisubizo ku bibazo by’imirire mibi, ubukungu n’imibereho rusange. Uyu mushinga watangijwe mu rwego rwo gufasha abaturage kubona uburyo burambye bwo kwitunga, bityo bagahagarika ibikorwa byo kwinjira muri pariki mu buryo butemewe birimo guhiga inyamaswa, guhinga mu gice cya pariki no gutega imitego yangiza urusobe rw’ibinyabuzima.
Abaturage bahawe amahugurwa n’ubumenyi ku bworozi bw’amafi, bigishwa uko bayitaho, uko bayagaburira no kuyacunga mu buryo bwa kinyamwuga.
Ibi byatumye babona ibiribwa bifite intungamubiri, by’umwihariko proteyine, banongera ubushobozi bwo kwinjiza amafaranga.
Mfitumukiza Innocent, uyoboye koperative yorora amafi ya COPECO Gishanda, avuga ko uyu mushinga wahinduye imibereho y’abanyamuryango bawo anabongerera ubumenyi ku kamaro ko kubungabunga pariki.
Ati:“Mbere twaburaga ibyo kurya bihagije, kandi hari abatekerezaga kujya muri pariki gushaka uko babaho. Ubu ubworozi bw’amafi bwaduhinduriye ubuzima, abana barya neza, twinjiza amafaranga atuma twishyurira Mituweli de Sante n’amafaranga y’ishuri.”
Yakomeje asobanura ko koperative ifite uburyo bufasha abaturage kubona amafi ku giciro gito, bityo bikabafasha kwihaza mu mirire no kwirinda kujya muri pariki mu buryo butemewe.
Ati:“Umuturage ucyennye ahabwa amafi ku buntu, mu gihe abandi bayabona ku giciro gito hagati y’1500-2000 by’amafaranga y”u Rwanda. Ibi bituma abaturage bihaza mu mirire, bakabona amafaranga yo kwiyishyurira ubwisungane mu kwiguza n’amafaranga y’ishuri, bakanigira mu kurinda pariki no kumenya akamaro kayo.”
Mfitumukiza agaragaza kandi ko kuba baribumbiye muri koperative byagabanyije akajagari mu kuroba, bigabanya impanuka zo kurohama zaterwaga no kwishora mu kiyaga nta bumenyi buhagije.
Kugabanuka kw’ibikorwa byangiza pariki n’izamuka ry’uruhare rw’abaturage
Amafaranga ava mu bworozi bw’amafi yafashije imiryango myinshi kubona Mituweli de Sante, kwishyura amafaranga y’ishuri (minerval) y’abana no kwikemurira ibindi bibazo by’ingenzi by’ubuzima n’uburezi. Ibi byagize ingaruka nziza ku mibereho rusange, binagabanya igitutu cyashyirwaga kuri pariki.
Uko imibereho y’abaturage yagendaga itera imbere, ni ko ibikorwa byangiza pariki byagabanukaga. Gutega imitego byaragabanutse cyane, naho inyamaswa zitangira kongera kwiyongera bitewe n’uko zitakomeje guhungabanywa n’ibikorwa bya muntu.
Nelly Nshimirimana, Umuyobozi Ushinzwe Iterambere ry’Abaturage muri Pariki y’Igihugu y’Akagera yagize ati:“Twabonye ko kubungabunga pariki bidashoboka hatabayeho uruhare rw’abaturage. Iyo babonye inyungu ibakomokaho, bahinduka abafatanyabikorwa mu kuyirinda aho kuyibonamo umwanzi.”
Kuri ubu, abaturage batanga amakuru ku gihe ku bantu bashaka kwinjira muri pariki mu buryo butemewe, pariki isigaye ifatwa nk’umutungo rusange ufitiye akamaro abaturage n’igihugu muri rusange.
Uruhare rwa Pariki mu guteza imbere ubworozi bw’amafi n’ubukungu bw’abaturage.
Karinganire Jean Paul, ushinzwe abafatanyabikorwa n’inkunga zinjira muri Pariki y’Igihugu ya Akagera, yavuze ko pariki igira uruhare rufatika mu guteza imbere imirire n’ubukungu bw’abaturage bayituriye.
Ati:“Pariki y’Igihugu ya Akagera ifasha amakoperative ayituriye ibaha umwayi w’amafi mu rwego rwo kwihaza mu mirire no guteza imbere ubukungu bwabo. Mu makoperative icyenda afite amadamu icumi, hatanzwe umwayi w’amafi ungana na 201,200 fish fingerlings.”
Yakomeje asobanura ko pariki inafasha abaturage kubona amafi ku giciro kiri hasi.
Ati:“Umuturage uturiye pariki abasha kubona ifi ku 2000 RWF ku kilo, mu gihe ahandi igura nka 4000 RWF. Ibi bituma abaturage bihaza mu mirire kandi koperative zigatera imbere.”
Karinganire Jean Paul yongeyeho ko mu mwaka wa 2025, koperative iroba mu biyaga bya pariki yarobye ibiro 246,484 by’amafi, aho ibiro 17,199 byacurujwe mu baturage baturiye pariki, bininjiriza koperative amafaranga asaga miliyoni 37. Abororera amafi hanze ya pariki na bo basaruye ibiro 34,205 binjiza asaga miliyoni 68.
Pariki kandi itanga amahugurwa ya buri mwaka ku makoperative yorora amafi, igamije kubigisha ubworozi bwa kinyamwuga kandi burambye, ndetse igashishikariza abaturage kuba ijisho rya pariki batanga amakuru ku gihe ku bashaka kuyangiza.
