Ishuri rya Le Flambeau ryatanze impamyabumenyi ku banyeshuri basoje umwaka w’amashuri basabwa ikintu gikomeye
Mu rwego rwo guha agaciro umuhate n’umurava byaranze abanyeshuri mu mwaka w’amashuri wa 2025-2026, ishuri La Fondamentale Le Flambeau riherereye mu Kagari ka Rukereza, Umurenge wa Muhoza, mu Karere ka Musanze, ryakoze umuhango wa kabiri wo gutanga impamyabumenyi (Graduation) ku banyeshuri barangije ibyiciro bitandukanye, uhereye ku bana basoje amashuri y’incuke (Maternal) kugeza ku barangije umwaka wa gatandatu w’amashuri abanza.
Uyu muhango wabaye ku Cyumweru tariki ya 19 Nyakanga 2026, ubera mu mbuga z’iri shuri witabirwa n’ababyeyi, abarimu, abayobozi b’inzego z’uburezi ndetse n’inshuti z’ishuri, mu rwego rwo kwishimira intambwe abana bateye no kubifuriza gukomeza urugendo rwabo rw’uburezi bafite icyerekezo.
Abanyeshuri bahawe impamyabumenyi bibukijwe ko gutsinda mu masomo bidahagije, ahubwo ko bikwiye kujyana no kurangwa n’ikinyabupfura, imyitwarire myiza ndetse no kugira intego ihamye ibaganisha ku ntsinzi.
Bimenyimana Jean Baptist uhagarariye ababyeyi barerera muri La Fondamentale Le Flambeau yashimye ubuyobozi bw’ishuri n’abarimu ku buryo bakomeje kurera no kwigisha abana babo, avuga ko impinduka zigaragarira mu bumenyi no mu myitwarire y’abana babo zibatera ishema.
Yagize ati: “Turishimira cyane uburezi bufite ireme iri shuri ritanga. Umusaruro tubona abana bacu bazana mu rugo ndetse n’imyitwarire yabo ni ikimenyetso cy’uko barerwa neza. Ikindi kidushimisha ni uko umwana wize muri iri shuri agaragaza ubushobozi bwo kuvuga Igifaransa n’Icyongereza mu buryo bwumvikana.”
Yakomeje ati:”Turasaba n’abandi babyeyi gukomeza kurigirira icyizere bakaharerera abana babo, kandi natwe dukomeze kubafasha gusubiramo no gusobanukirwa neza ibyo bize igihe bari mu rugo.”
Umuyobozi wa La Fondamentale Le Flambeau(Directeur), Niyigena Alphonse, yashimiye abanyeshuri bose ku murava n’umuhate bagaragaje mu mwaka wose w’amashuri, anashimira by’umwihariko ababyeyi badahwema kuba hafi y’abana babo.
Yagize ati: “Turashimira cyane abanyeshuri bacu bose ku bw’umuhati bakomeje kugaragaza mu masomo yabo. Turashimira kandi ababyeyi bakomeje kubaba hafi muri uru rugendo rwo kongera ubumenyi. Twishimiye cyane uburyo bigomwe byinshi bakitabira uyu munsi w’ibyishimo byo kwishimira abana babo, kuko ubufatanye bw’umubyeyi n’ishuri ari bwo bwubaka umwana ufite ejo hazaza heza.”
Yakomeje asaba ababyeyi gukomeza gukurikirana abana babo umunsi ku wundi, bakabafasha kubona ibikoresho by’ishuri no kubafasha kubahiriza gahunda z’amasomo, kuko ari imwe mu nkingi zifasha umwana gutsinda no gukura neza.
Abana na bo yabasabye gukomeza gufata amasomo nk’urufunguzo rw’ejo hazaza habo, bakagira uruhare mu iterambere ry’imiryango yabo n’iry’igihugu muri rusange, banarangwa n’isuku n’imico myiza kuko ari byo bibafasha kugira ubuzima bwiza no gutekereza neza.
Umuyobozi ushinzwe uburezi mu Murenge wa Muhoza Hakizimana Innocent, yashimiye Leta y’u Rwanda ku ruhare ikomeje kugira mu guteza imbere uburezi bufite ireme no kugeza amahirwe yo kwiga kuri buri mwana.
Yagize ati: “Turashimira ubuyobozi bw’igihugu bukomeje gushyira uburezi ku isonga, bugaharanira ko buri mwana w’u Rwanda ahabwa uburezi bwiza n’ubumenyi bumutegurira kuzavamo umuturage ufite ubushobozi bwo kwiyubakira igihugu.
Ati:’Turasaba abanyeshuri gukomeza kugira umurava, ikinyabupfura no kwirinda ibishuko n’ikigare bishobora kubatesha umurongo w’ubuzima.”
Yanashishikarije abana gukomeza kurangwa n’indangagaciro z’ubunyangamugayo, gukunda umurimo no guhora baharanira kugera ku ntego bihaye.
Mu ijambo rye, Umuyobozi Mukuru (Principal) wa La Fondamentale Le Flambeau, Nayigiziki Joel, yavuze ko iri shuri ryashinzwe mu mwaka wa 2022 rifite intego yo korohereza ababyeyi kubona uburezi bwiza hafi yabo.
Yagize ati: “Twatangije iri shuri dufite icyerekezo cyo gufasha ababyeyi kubona uburezi bufite ireme kandi hafi yabo. Dutangira twari dufite abanyeshuri 24 gusa bo mu byiciro bitatu by’amashuri y’incuke n’abarimu batatu.
Ati:”Uyu munsi twishimira ko tumaze kugira abanyeshuri barenga 350 biga mu byiciro bitandukanye, kandi bakigishwa mu ndimi zirimo Icyongereza n’Igifaransa. Ibyo bidutera imbaraga zo gukomeza kunoza serivisi z’uburezi duha ababyeyi batugiriye icyizere.”
Yakomeje asaba abanyeshuri barangije gukomeza kuba aba ambasaderi beza ba La Fondamentale Le Flambeau aho bazakomereza amasomo yabo hose.
Yagize ati: “Mukomeze kurangwa n’umurava, ikinyabupfura n’indangagaciro nziza. Murwanye ikigare n’ibishuko bishobora kubatesha intego, mukomeze guharanira gutsinda no kuba urumuri rw’imiryango yanyu, rw’ishuri ryanyu ndetse n’igihugu cyacu. Mube aba ambasaderi beza ba Le Flambeau aho muzajya hose.”
La Fondamentale Le Flambeau ryatangiye ibikorwa byaryo mu mwaka wa 2022 rifite abanyeshuri 24 gusa bigaga mu byiciro bya Maternal 1, Maternal 2 na Maternal 3, ndetse rifite abarimu batatu. Mu gihe cy’imyaka ine rimaze rikora, ryateye intambwe ishimishije, aho ubu rifite abanyeshuri barenga 350 biga mu byiciro bitandukanye by’amashuri y’incuke n’abanza.
Ubuyobozi bw’iri shuri buvuga ko buzahora bushyira imbere ireme ry’uburezi, uburere bushingiye ku ndangagaciro n’ubufatanye n’ababyeyi, mu rwego rwo gutegura abana bafite ubumenyi, ubushobozi n’imico ibafasha kuzavamo abaturage bafite uruhare mu iterambere rirambye ry’u Rwanda.
