U Rwanda rushaka kwagura amasoko y’ibikomoka ku buhinzi n’ubworozi binyuze mu imurikagurisha mpuzamahanga rya IFE 2026
Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB), gifatanyije n’ibigo bikora ubucuruzi bwambukiranya imipaka, kiri mu bitabiriye imurikagurisha mpuzamahanga ry’ibiribwa n’ibinyobwa ririmo kubera mu mujyi wa London mu Bwongereza.
Iri murikagurisha rizwi ku izina rya International Food & Drink Event 2026 (IFE), rihuza ibihugu byinshi byo hirya no hino ku Isi, aho rimurikirwamo ibicuruzwa bitandukanye birimo ibiribwa n’ibinyobwa. Ryabereye mu kigo cya ExCeL London, ritangira ku wa 30 Werurwe 2026 rikazarangira ku ya 1 Mata 2026.
U Rwanda rwaryitabiriye rugamije gushimangira umwanya warwo ku masoko mpuzamahanga, no gushaka andi mashya ashobora gusimbura ayo mu Burasirazuba bwo Hagati, aho ubucuruzi bwahungabanyijwe n’ibibazo by’umutekano mucye byatewe n’intambara iri mu karere ka Iran.
Kwitabira iri murikagurisha ni imwe mu ngamba igihugu cyihaye zo kongera agaciro ku bicuruzwa by’ubuhinzi n’ubworozi, kubimenyekanisha ku rwego mpuzamahanga no gushaka abakiliya bashya mu bihugu by’u Burayi n’ahandi.
IFE isanzwe ihuriza hamwe inzobere n’abacuruzi b’ibikomoka ku buhinzi, ibinyobwa n’urwego rw’ubukerarugendo, aho buri mwaka yitabirwa n’ibihumbi byinshi by’abashyitsi n’abamurika ibikorwa byabo.
Ku ruhande rw’u Rwanda, kuba rukomeje kwagura ibyoherezwa mu mahanga bituma rufatwa nk’umwe mu bafatanyabikorwa bafite uruhare rukomeye mu iterambere ry’ubucuruzi mpuzamahanga bushingiye ku buhinzi.
Mu gihe amasoko yo mu Burasirazuba bwo Hagati akomeje guhura n’imbogamizi, gushaka amasoko mashya mu Burayi bishobora gufasha u Rwanda gukomeza kubona amafaranga ava mu byoherezwa mu mahanga no kugabanya ingaruka z’ihungabana ry’ubucuruzi.
Biteganyijwe ko iri murikagurisha rya IFE 2026 rizitabirwa n’abantu barenga ibihumbi 25,000 baturutse mu bihugu bitandukanye.
Imibare yatangajwe na Minisiteri y’Ubuhinzi n’Ubworozi ku wa 18 Ukuboza 2025 igaragaza ko mu mwaka wa 2025, ibikomoka ku buhinzi n’ubworozi byinjirije u Rwanda arenga miliyoni 893.1 z’amadolari ya Amerika.
Mu rwego rwo gukomeza kuzamura aya mafaranga, mu ngengo y’imari ya 2025/2026 hateganyijwe ko ibyoherezwa mu mahanga bizinjiriza igihugu arenga miliyari 1 y’amadolari ya Amerika.
