Gen. Muhoozi ahobora gushoza intambara kuri Kenya

Mu mvugo ikomeje gutera impaka mu karere, General Muhoozi Kainerugaba, umuhungu wa Perezida Yoweri Museveni akaba n’Umugaba Mukuru w’Ingabo za Uganda, yongeye kugaragaza ko igihugu cye gikwiye kubona inzira igana ku Nyanja y’Abahinde binyuze ku butaka bwa Kenya.

Ni ijambo ryaje rikurikira ibyavuzwe na Perezida Museveni mu minsi ishize, aho yavuze ko Uganda “ifite uburenganzira ku nyanja,” n’ubwo nta gace kayo gaherereye ku nkombe.

Mu butumwa Muhoozi yanditse ku mbuga nkoranyambaga, bwakiriwe nk’ubufite amashyengo y’ubwirasi n’igitutu, yavuze ko Kenya igomba gutanga inzira yihuse kandi itekanye Uganda yakwifashisha mu kugera ku nyanja.

Yavuze ko kubura uko ibicuruzwa by’igihugu bigezwa ku nyanja byabaye ikibazo gikomeye mu iterambere, anongeraho ko bidakwiye gufatwa nk’ikibazo cy’ubucuruzi gusa, ahubwo nk’uburenganzira bw’igihugu ku bushake bwacyo n’ubusugire bwacyo.

Yagize ati: “Kenya igomba kuduhereza vuba inzira ituganisha ku Nyanja y’Abahinde. Nitabikora, bizateza ibibazo bikomeye mu bihe bizaza.” Aya magambo yatangaje benshi muri Kenya no muri Uganda, kuko asa no gushyira igitutu ku gihugu gituranyi mu buryo butari busanzwe mu mubano w’ibihugu bigize EAC.

Ibi bisubiwemo bya Muhoozi bibaye nyuma y’uko Perezida Museveni na we aherutse kuburira ko “inyanja ari iyabo,” ndetse agasaba ko mu bihe biri imbere Uganda igomba kugira inzira yayo igana ku nyanja mu buryo budasobanutse neza. Ibyo byahise bituma havuka impaka ndende mu banyapolitiki, abanyamategeko ndetse n’abasesenguzi bo mu karere, bibaza niba ibi bisa n’ugutera icyerensa igihugu gituranyi.

Mu karere ka Afurika y’Iburasirazuba, aho ubuhahirane n’ubuhahirane bukomeje kwaguka, amagambo nk’aya yateje impungenge ku hazaza h’umubano wa Uganda na Kenya. Abasesenguzi bavuga ko ibi bishobora gukongeza umwuka mubi mu gihe bidakemuwe mu mahoro, cyane ko Kenya ari yo nzira nyamukuru Uganda inyuzaho ibicuruzwa bivanwa cyangwa bijya mu mahanga.

Icyakora kugeza ubu, nta mwitwarire wihariye Kenya yagaragaje ku magambo ya Museveni na Muhoozi, uretse bamwe mu banyapolitiki n’abaturage banyuze ku mbuga nkoranyambaga bagaragaje ko ibyo Uganda ivuga bitashoboka mu buryo bw’amategeko, amateka ndetse n’ubusugire bw’igihugu.

Ni ibirego bikomeye bishobora kwongera imbarutso y’amakimbirane y’ijambo, mu gihe ubuyobozi bw’ibihugu byombi busabwa kwisunga inzira ya dipolomasi kugira ngo ubuhahirane n’umutekano byakomeje kuba ingingo z’ingenzi mu muryango wa EAC bitaba byugarijwe.