Samia Suluhu yatsinze amatora ya Perezida muri Tanzania n’amajwi 97,66%

Komisiyo y’Amatora ya Tanzania yatangaje mu gitondo cyo kuri uyu wa Gatandatu ko Perezida Samia Suluhu Hassan yongeye kwegukana intsinzi mu matora y’Umukuru w’Igihugu, aho yabonye amajwi 97,66%.

Samia, wageze ku butegetsi mu 2021 asimbuye nyakwigendera John Pombe Magufuli, azayobora Tanzania indi myaka itanu iri imbere. Iki gihugu gifite abaturage barenga miliyoni 68.

Amakuru ya komisiyo agaragaza ko Samia yabonye amajwi agera kuri miliyoni 31,9 mu bantu miliyoni 37,6 biyandikishije gutora, ubwitabire bukaba bwari kuri 87%.

Iyi ntsinzi yakurikiwe n’imyigaragambyo y’urubyiruko ruvuga ko amatora atabaye mu mucyo, kuko bamwe mu batavuga rumwe n’ubutegetsi batemerewe kwiyamamaza. Abigaragambya batwitse inyubako za leta ndetse banamanura amafoto ya Samia yari ahantu hatandukanye.

Inzego z’umutekano zahise zisaba abaturage kuguma mu rugo kugira ngo birinde ko imvururu zifata indi ntera.

Minisitiri w’Ububanyi n’Amahanga, Mahmoud Thabit Kombo, yavuze ko ibibazo byabaye mu bice bimwe na bimwe bidakabirije, anenga amakuru avuga ko abashinzwe umutekano bakoresheje ingufu z’umurengera.

Samia w’imyaka 65 azwiho gukomeza umurongo w’iterambere igihugu cyari cyarafashe mu gihe cya Magufuli, anashimirwa kuba yarayoboye igihugu mu buryo bw’ituze nyuma y’urupfu rwe.