Rutsiro Yiteguye Kwakira Kivu Beach Expo 2025: Iserukiramuco Rizahindura Isura y’Ubukerarugendo bwa Boneza
Mu rwego rwo kwitegura Kivu Beach Expo & Festival 2025, iserukiramuco rinini rihuza imyidagaduro n’imurikagurisha ritegurwa na Yirunga LTD ku bufatanye n’Akarere ka Rutsiro, ibikorwa byo gusura abafatanyabikorwa birimo abashoramari n’abaturage bo mu Murenge wa Boneza birarimbanyije. Intego ni ukureba aho imyiteguro igeze no gutegura neza iri serukiramuco rigiye kuba ku nshuro ya mbere muri aka karere gafite amahirwe akomeye y’ubukerarugendo.
Abafite ibikorwa by’ubukerarugendo mu nkengero z’ikiyaga cya Kivu, barimo Hon. Odette Nyiramirimo, nyiri Ruchel Kivu Beach Hotel, ndetse na nyiri KaySun Hotel i Kariba, bashimiye iki gikorwa bavuga ko kije gushyigikira ubukerarugendo mu Karere ka Rutsiro no kongera umubare w’abashyitsi basura aka gace. Bavuga ko iri serukiramuco rizubaka izina rya Boneza, agace gafite ibyiza nyaburanga byinshi bitarimo kubyazwa umusaruro uko bikwiye.
Ku kirwa cya Bugarura, gituwe n’abaturage basaga 2,000, abaturage bagaragaje ko ibikorwa by’ubukerarugendo byatangiye gutuma ikirwa cyabo imenyekana ku rwego rw’igihugu. Bavuze ko kwakira ibikorwa nk’ibi bibaha icyizere gishya mu iterambere no mu kwinjira mu bukerarugendo bubabyarira inyungu.
Uwizeyimana Emmanuel, Umuyobozi w’Akarere Wungirije ushinzwe Ubukungu, yavuze ko ibikorwa byo kwitegura Expo bigeze kure cyane.
mu rwego rwo gufasha abazitabira bafite imodoka ngufi kugera ahabereye ibikorwa byose. Yagize ati: “Turi gukoresha imashini zikora imihanda kugira ngo ahantu hose hagerwe n’imodoka nto, kandi ndashimira abaturage batanze umusanzu wabo ndetse na za kampani zatanze imashini na mazutu muri iki gikorwa.”
Yagarutse ku musaruro witezwe agira ati: “Iri serukiramuco rizateza imbere ubuhinzi n’ubukerarugendo, cyane ko imirenge igera kuri irindwi ikora ku kiyaga ifite amahoteli, umucanga n’ibindi byiza bikurura ba mukerarugendo.”
“Bizafasha abaturage kubona akazi, kongerera agaciro ibikorwa byabo no kwiteza imbere.” “Ni uburyo bwiza bwo kumenyekanisha Akarere no gukurura abashoramari bashya.”
Umuyobozi wa Yirunga LTD, Yves Iyaremye, yavuze ko Kivu Beach Expo & Festival izaba irimo udushya twinshi tugamije gukurura ba mukerarugendo baturutse mu mpande zitandukanye z’igihugu n’akarere. Muri ibyo bikorwa harimo:
Hiking ya kilometero 20
Umukino wa Badminton uzabera kuri KaySun Hotel
Amasiganwa y’amato, amarushanwa yo koga
Volley Beach izakinirwa kuri Ruchel Kivu Beach Resort ku wa 13 Ukuboza
Gusura Inyambo zoga mu Kivu
Gusura ikirwa cya Napoleon
Ubukerarugendo bwa kawa muri Boneza Coffee
Iyaremye yongeyeho ko:”Iyi Expo ibaye ku nshuro ya mbere mu mateka ya Rutsiro, ibintu byitezweho guhindura isura y’ubukerarugendo muri aka karere”
Imihanda yari imbogamizi ubu yamaze kubakwa, harimo: Shusho – Nkomero, Mushubati – Shusho, N’umuhanda Gahabwa ujya kwa Senateri Karangwa Chrisologue no kwa Senateri Nyiramirimo, wari uteganyijwe gukorwa umwaka utaha, ariko ubu uri kubakwa kubera iyi Expo.
Yavuze ko iyi mihanda izoroshya ingendo n’ubwikorezi, bityo abitabira Expo n’abashyitsi bazagenda batabanje guhura n’imbogamizi z’inzira. Ati: “Ubu imodoka yose ishobora kunyura aha hantu. Twashakaga ko abitabira Expo babona ko Rutsiro ifite imihanda myiza no kwakira neza ishoramari ry’ubukerarugendo.”
Yavuze kandi ko hateguwe abahanzi bakomeye bazasusurutsa abazitabira iserukiramuco, barimo: Papa Cyangwe, Gisupusu, Young Grace, Impala, Theo Bosebabireba, Platin, Mico The Best.
Yemeza ko imyiteguro yose yarangiye neza kandi ku rwego rushimishije. Ku nshuro ya mbere mu mateka y’Akarere ka Rutsiro, hazabera Boat Party ku matariki ya 13–14 Ukuboza 2025. Abahanzi n’abadije bazwi bazasusurutsa abashyitsi bari mu bwato hagati mu kiyaga cya Kivu, mu birori bizarangwa n’umuziki, ibyishimo n’umwuka w’amahoro utatse inkombe z’ikiyaga.
Kuwa 15 Ugushyingo 2025, Umuyobozi w’Akarere ka Rutsiro, Kayitesi Dative, yavuze ko iri serukiramuco rizerekana intera ubukerarugendo bw’akarere bumaze gutera.
Ati: “Icyo twiteze muri iri serukiramuco ni ukwishimira ibyagezweho mu bukerarugendo no kumenyekanisha Rutsiro nk’Akarere gafite amahirwe menshi. Ni uburyo bwo kwereka abashoramari ko Rutsiro ari ahantu heza ho kuruhukira no gukorera ishoramari ry’igihe kirekire.”
Yibukije ko Rutsiro ifite ibyiza byinshi birimo ikiyaga cya Kivu, ibirwa bitandukanye, Inyambo zoga, amoko menshi y’inyoni n’ibimera byihariye, hamwe n’amahoteli agezweho atatse inkombe z’ikiyaga.
Kivu Beach Expo & Festival izaba kuva ku wa 09 kugeza ku wa 15 Ukuboza 2025, mu busitani bunini bwa Palega Beach Inn, ahitegeye neza ikirwa cya Bugarura.
Iri serukiramuco ritegerejweho kuba umusemburo mushya w’iterambere ry’ubukerarugendo mu Karere ka Rutsiro, gutanga amahirwe mashya y’ishoramari no kongera ubushobozi bw’abaturage binyuze mu bukerarugendo bubyara inyungu.
