Pariki y’Akagera yahaye uturere tuyikozeho inkunga y’arenga miliyari 1,286,000,000 Frw
Kuri iki cyumweru tariki ya 23 Ugushyingo 2025, Pariki y’Akagera yashyikirije Akarere ka Nyagatare inkunga y’amafaranga akomoka ku bukerarugendo (Park Tourism Revenue Sharing) angana na 285,913,418 Frw, igamije gushyigikira ibikorwa by’iterambere ry’abaturage baturiye Pariki no kurushaho kubafasha kugera ku mibereho myiza.
Iyi nkunga isanzwe itangwa buri mwaka, igahabwa imirenge ihana imbibi na Pariki y’Akagera ariyo Karangazi na Rwimiyaga. Aya mafaranga afasha mu mishinga y’iterambere rigamije guteza imbere imibereho y’abaturage ndetse no gukumira ibikorwa bishobora kwangiza Pariki.
Kuva mu mwaka wa 2019 kugeza muri 2024, Akarere ka Nyagatare kamaze guhabwa inkunga yose hamwe ingana na 686,262,581 Frw. Muri yo, 568,019,518 Frw yashowe mu mishinga y’ibikorwaremezo naho 118,243,063 Frw akoreshwa mu mishinga y’abaturage ibyara inyungu. Aya mafaranga yakoreshejwe mu bikorwa bitandukanye bigamije kuzamura iterambere n’imibereho y’abaturage baturiye Pariki.
Iyi nkunga yabaye isoko y’iterambere mu bice bikikije Pariki, aho imishinga ishyirwa mu bikorwa yibanda ku kubaka amavomo akoresha imirasire y’izuba, kubaka amarerero agezweho (ECDs), kubaka amasoko mato, kugeza amashanyarazi mu baturage batari bafite umuriro, kugura ibikoresho bya siyansi mu mashuri n’ibindi bikorwa bifasha imibereho rusange.
Hanashyigikiwe kandi imishinga ibyara inyungu irimo gutanga amatungo magufi, guteza imbere ubworozi butandukanye no gufasha abaturage mu bukorikori n’ubushabitsi.
Iyi gahunda yagiye ifasha abaturage bo mu mirenge ya Karangazi na Rwimiyaga kwikura mu bukene no kongera ubushobozi bw’imibereho yabo. Abaturage bavuga ko iyi gahunda yaje kubafasha kubona inyungu zituruka ku bukerarugendo bwa Pariki y’Akagera ndetse ikabongerera ubushake bwo kuyibungabunga.
Abayobozi b’Akarere ka Nyagatare hamwe n’ubuyobozi bwa Pariki y’Akagera batangaje ko iyi gahunda izakomeza gushyigikira iterambere ry’abaturage baturiye Pariki no kongera ubufatanye mu kubungabunga ibidukikije n’urusobe rw’ibinyabuzima mu buryo burambye.
Uretse Nyagatare, Pariki y’Akagera yanashyikirije utundi turere duhana imbibi na yo inkunga ibafasha mu iterambere rusange:
Akarere ka Kayonza kakiriye miliyoni 857,740,255 Frw, Akarere ka Gatsibo kakiriye miliyoni 132,346,327 Frw, Naho Nyagatare yahawe miliyoni 285,913,418 Frw.
Byose hamwe bigera kuri 1,286,000,000 Frw yashyikirijwe uturere dutatu mu mwaka wa 2025.
Aya mafaranga yose yunganira abaturage mu iterambere, akarushaho kubahuza n’uruhare rwo kubungabunga Pariki no kumenya ko ubukerarugendo butanga inyungu zisubira mu baturage ubwabo.
